بە ئامادەبوونی جێگری سەرۆکی کۆنفدراسیۆنی ڕەوەندی کوردستانی و بەرپرسی ناوەندی لۆڤین لە وڵاتی بەلجیکا و، چەند کەسایەتی دیکەی کورد، ناوەندی ڕەوەندی کوردستانی لە شاری برۆکسل دامەزرا.
ڕۆژی یەکشەممە، ڕێککەوتی 26.03.2023 لە بەلجیکا، بە ئامادەبوونی هەورامان عەلی تۆفیق جێگری سەرۆکی کۆنفدراسیۆن و، دیار مەلا محەمەد ئەمین ئەندامی لیژنەی ڕاوێژ و، مەزڵوم دلی بەرپرسی ناوەندی رەوەندی کوردستانی-لۆڤین لە بەلجیکا و، چەند کەسایەتییەکی دیکەی کورد، ناوەندی ڕەوەندی کوردستانیان لە برۆکسل دامەزراند.
دوای تاوتوێ کردنی پرسە تایبەتەکانی ڕەوەندی کوردستانی و ڕوونکردنەوەی تایبەت لەسەر هەنگاو و ئامانجەکانی کۆنفدراسیۆن و ناوەندی ڕەوەندی کوردستانی، جەختیش لەسەر هەماهەنگی ناوەندەکان کرایەوە.
جێی باسە، لەلایەن ئامادەبووانەوە پیرۆزبایی لە جیهانگیر عالی مەلا کرا، کە وەک بەرپرسی ناوەندی رەوەندی کوردستانی-برۆکسل دەستنیشانکرا.
