خورشید مزوری خاوەن و بەڕێوەبەری جێبەجێکاری گرووپی کۆمپانیاکانی تانج، هاوڕێ لەگەڵ ئەندازیار ئەردەوان مەڕوان بەڕێوەبەری پەیوەندییەکانی گرووپی کۆمپانیاکانی تانج، لە ئۆفیسی سەرەکی شاری هەولێر پێشوازیان لە مستەر کورد رۆژنامەوانی نێودەوڵەتی و نوێنەری کۆنفدراسیۆنی رەوەندی کوردستانی لە ئەمریکا و کەنەدا کرد.
لە سەرەتای ئەو دانیشتنەکەدا، خورشید مزوری وێڕای بەخێرهاتنکردنی مستەر کورد، هاوکات خەبات و تێکۆشانی دڵسۆزانەی ناوبراوی لە ئاستی نێودەوڵەتی دا بۆ بەرەوپێشبردنی پرسی کورد بەرز نرخاند و، لەم پەیوەندییەدا، رەحیم رەشیدی بە تاکێکی بە توانا و پڕ ئەزموون وێنا کرد.
هەروەها تیمی گرووپی کۆمپانیاکانی تانج، دەربارەی سەرکەوتنی پڕۆسەی دەستەخوشکی نێوان ناشڤیل و هەولێر و کرانەوەی لقی نەشتەرگەرانی ئەمریکی لە کوردستان و، رۆڵی دڵسۆزانەی مستەر کورد و کۆنفدراسیۆنی رەوەندی کوردستانییان بەرز نرخاند و لەمبارەوە سوپاسیان لە ناوبراو کرد.
لای خۆیەوە مستەر کورد، وێڕای دەربڕینی سوپاس و پێزانین بۆ ئەو پێشوزاییە گەرم و دۆستانەیە، رایگەیاند کە ئەوان وەک رەوەندی کوردستانی بە ئەرکی خۆیان دەزانن لە هەموو دەرفەتەکان بۆ خزمەتی کوردستان کەڵک وەربگرن.
هاوکات رەشیدی بە فەرمیی داوای لە خورشید مزوری خاوەن و بەڕێوەبەری جێبەجێکاری گرووپی کۆمپانیاکانی تانج کرد کە سەردانی ئەمریکا بکەن و، لەم پەیوەندییەدا بەڵێنی هەموو ئاسانکاری و هاوکارییەکی مومکینی پێدان و، هەروەها بۆ گەشەی پەیوەندییە ئابوورییەکانی نێوان واشنگتن و هەولێر چەند پێشنیار و پڕۆژەی بازرگانی بەسوودی خستەبەردەم تیمی گرووپی کۆمپانیاکانی تانج.
لە کۆتایی دا، هەردوو لا وێڕای دەربڕینی خۆشحاڵی خۆیان لەو دیدارە، بڕیاریاندا ئەو دیدار و کۆبوونەوانە لە پێناو ئاوەدانکردنەوەی پتری کوردستان و تێکەڵبوونی کوردستانیانی نێوخۆ و دەرەوە، بۆ چالاکی جۆراوجۆر پەرە پێبدەن
