شێعر / نامق هەورامی
کەتۆ ملینە وەهار بۆ زمسان
سەرمڎۆ وەلام ناڵەی بێ سامان
داڎ یاوۆ لا کێ، کێ پەرسۆ ئامان
پەی دوریت جەکێ گێرونە دامان
بۆرێ نازارێ بینایی چەمام
دەپۆ دودەری تەنیایی خەمام
٭٭٭٭٭٭٭
بیەیت پێسەنە دوەلا و وەهاری
وشکەساڵی بۆ تۆ واران باری
وەختێ مزانی بەدڵەی داخداری
چیشت دان دوری چی تەشریف نماری
دوری دەردەنە، بۆرێوە وەلام
دەپۆ دوودەری تەنیایی خەمام
٭٭٭٭٭٭
کۆپڕ گەر نەزیۆ سورە هەراڵە
جەداڵانینە پەڕنەبۆ پیاڵە
یۆوە هەردویما نەگنمێ ناڵە
پێ کێش بوانو داڎو قەباڵە
داڎو ناڵەکەم، بەتۆ بۆ تەمام
دەپۆ دوودەری تەنیایی خەمام
٭٭٭٭٭٭٭٭٭٭
هەراڵە برەمی گرد خەمبارێنێ
تانەیۆ ئاڎێ گەردەن لارێنێ
ئای گەر بزانی چنن عەیارێنێ
پەی ئامای باڵایت رۆ ژمارێنێ
روێ مژمارو ، خەمێ نەبەرام
دەیپۆ دوودەری تەنیایی خەمام
٭٭٭٭٭٭٭
بۆرێ ماوای دڵ چێشکەری جەدوور
ساراو چناریت کەردەن شارەزوور
زمسانم ئامان وینیۆ جەدوور
ئاوی تۆریا جەدەرەو پلوور
تەقان دەرەی خەم، پلورۆ چەمام
بینە دوودەری تەنیایی خەمام