بەختیار رۆستەم (بەختیار جاف) لە ساڵی ١٩٦١ لە کەرکووک لەدایک بووە. بەهۆی ئەوەی باوکی دادوەر بووە و هەر ماوەیەک کارەکەی کەوتووەتە شوێنێک، لەگەڵ خێزانەکەی لە چەندین شاری کوردستان و عێراق ژیاون وەک شارەکانی هەڵەبجە، ئاکرێ، سلێمانی، دهۆک و رومادی. لە ناوەڕاستی هەشتاکان بۆ خوێندن چووەتە یوگوسلاڤیا و کۆلێژی زانستە سیاسییەکانی تەواو کرد و ئێستاش لەگەڵ خێزانەکەی، لە سلۆڤینیا دەژی.
دوای تەواوکردنی کۆلێژ، بەختیار جاف دەستی بە کاری رۆژنامەنووسی کردووە، بە نووسەری و دواتر وەک سەرنووسەر لە رۆژنامەی عوکازی سعودی کاری کردووە. هەروەها لە چەندین رۆژنامەی بەڵقان و سلۆڤینیا کاری کردووە، جگە لە وەرگێڕان و وانەگوتنەوە لە زانکۆ.
ئەو کەسایەتییە کوردە، یەکێکە لە دامەزرێنەرانی پەیمانگەی نێودەوڵەتی بۆ توێژینەوە و لێکۆڵینەوە لە کاروباری رۆژهەڵاتی ناوەڕاست و بەڵقان (ئیفیمیسIFIMES) و لە ٢٠٠١یشەوە بەڕێوەبەری پەیمانگاکەیە. سەرەرای ئەوەی لە ساڵەکانی ٢٠٠٤ – ٢٠٠٨ راوێژکاری سەرۆک وەزیرانی سلۆڤینیا بوو و لە ساڵی ٢٠١٧ تا ٢٠٢١یش راوێژکاری تایبەتی سەرۆک وەزیرانی مەکەدۆنیایە.
ئەو سیاسەتمەدارە کوردستانی – سلۆڤینییە پێیوایە پەیوەندییەکی توندوتۆڵ لە نێوان کاری رۆژنامەنووسی و دیپلۆماسی هەیە. بەڕای ئەو:رۆژنامەنووس نابێ تەنیا بە بڵاوکردنەوەی هەواڵ بووەستێت، بەڵکو دەبێ لێکۆڵینەوە لە وردەکارییەکانی هەواڵ و شرۆڤەی بابەتەکان ، پەیوەندییەکانی فراوان بکات.
بەختیار جاف لە دیمانەیەکدا، باسی لە بەشێک لە چالاکییەکانی ئیفیمیس کرد کە هەوڵی دروستکردنی زەمینەی لەبار بۆ پەیوندیی دیپلۆماسیی وڵاتانی رۆژهەڵاتی ناوەڕاست و مەغریبی عەرەبی لەگەڵ وڵاتانی ئەوروپی دەدەن، بۆ ئەوەی رێگاچارەی گونجاو بۆ ئاریشەکان بەتایبەت کێشەی چوونی پەنابەران بۆ ئەوروپا، بدۆزنەوە.
ئەرکی ئەو سیاسەتمەدارە کوردە لە کاتی راوێژکارییەکەیدا بۆ سەرۆک وەزیرانی سلۆڤینیا، دروستکردنی پەیوەندیی سلۆڤینیا بە رۆژهەڵاتی ناوەڕاست بە گشتی و وڵاتانی کەنداو بە تایبەت بووە. دوای سەربەخۆبوونی سلۆڤینیا، یەکەم سەردانی یەکەم سەرۆک وەزیرانەکەی بۆ کوێت، سعودیە و عێراق لەلایەن بەختیار جافەوە رێک خراوە.
ئەو رێکخراوەی بەختیار جاف دایمەزراند (ئیفیمیس)، ئێستا ٢٠٩ ئەندامی لە ٢٧ وڵاتی جیا هەیە، کە هەموویان پێشتر یان ئێستاش لە پلە و پۆستی باڵای سیاسی و سەربازین و دەسەڵاتی بڕیاردانیان بەبێ گەڕانەوە بۆ ئەنجوومەنی کارگێڕیی ئیفیمیس، هەیە.
دروستکردنی لۆبییەکی بەهێز لە دەرەوە لەلایەن حکومەتی هەرێمی کوردستانەوە، بە ڕای بەختیار جاف، مەرجێکی سەرەکیی دروستکردنی پەیوەندیی دیپلۆماسییە لەگەڵ وڵاتان. ئەو نموونە بەوە دەهێنێتەوە، کە نوێنەرایەتییەکانی حکومەتی هەرێمی کوردستان لە پێش ریفراندۆمی سەربەخۆیی لە ٢٠١٧، نەیانتوانی لۆبییەکی باش دروست بکەن، چونکە بەرنامەیەکی تۆکمە و ستراتیژیی وردیان نەبوو، جگە لەوەی هەرێمی کوردستان کەوتووەتە جوگرافیایەکی نالەبار و دروستکردنی گرفت بۆی لەلایەن دراوسێکانییەوە.
هەرێمی کوردستان بۆ ئەوەی لۆبییەکی بەهێز دروست بکات، پێویستە هەیکەلی نوێنەرایەتییەکانی دابڕێژێتەوە، بەختیار جاف پێیوایە گرنگ نییە نوێنەرایەتی لە هەموو وڵاتێک هەبێ، باشترە کەسانی شیاو و پڕ لە وزە لە نوێنەرایەتییەکان دابنرێن، یان راوێژکاری تایبەتی هەبێ بۆ رێکخستنی پەیوەندییەکان و گرنگیش بە هەموو وڵاتەکان بدات
لە سەرانسەری دونیا ٩٠٠ نەتەوەی جیا هەن، کە ٢٠١یان خاوەن دەوڵەتی سەربەخۆن، ئەو سیاسەتمەدارە کوردە باسی لەوە کرد، کە گۆڕینی سنووری وڵاتان بەدەست گەل و نەتەوەکان نییە، بەڵکو مێژوو سەلماندوویەتی کە بەدەست وڵاتانی گەورە و خاوەن بڕیارە. گەورەیی و فراوانیی نەتەوەش هەروەک جاف ئاماژەی پێکرد، کاریگەری بەسەر دروستبوونی دەوڵەتەوە نییە، ئەو نموونەی بە گەلی مۆنتینیگرۆ و گەلانی کورد و ئەمازیغی هێنایەوە، گەلی مۆنتینیگرۆ لە ئەوروپا ٦٥٠ هەزار کەسن و خاوەنی دەوڵەتن و گەلی کورد و ئەمازیغیش لەگەڵ ئەوەی زۆر زیاترن لە رووی ژمارەی دانیشتوان و فراوانیی خاکەکەیانەوە، کەچی دەوڵەت نین.
بەختیار جاف کە بلیمەتە لە لۆبی دروستکردن و ئێستاش راوێژکارە لە پەیمانگای لۆبی لە وڵاتی سڕبیا، جەخت لەوە دەکاتەوە، کە بۆ دروستکردنی لۆبییەکی بەهێز بۆ کوردستان، پێویستە رێکخراو و سەنتەرە جیاوازە کوردییە حزبی و غەیرە حزبییەکان هەوڵی بوونە ئەندام لە دەزگا نێودەوڵەتییەکانی وەک بەشەکانی نەتەوەیەکگرتووەکان بدەن، بۆ ئەوەی بتوانن دەنگی گەل و حکومەتی هەرێمی کوردستان بگەیەنن. هەروەها بە پێویستیشی دەزانێ حکومەتی هەرێمی کوردستان گرنگیی زیاتر بە وڵاتانی ئەوروپا بدات و دەست بە هەڵمەتێکی دیپلۆماسیی چڕ بۆ دروستکردنی پەیوەندی و بەرژەوەندیی هاوبەش لەگەڵ ئەو وڵاتانە، بکات.