ئەی غەمگینترین
ئەی عاشقترین ….
بەم دوو دارشەقەوە ، بەنیازی بەم رێگەی عشقەدا
بگەیتە کوێ ؟
لەم ژوورە بێ دەرگاو پەنجەرەیەدا
چۆن فێری فڕین ئەبی ؟
بەم سەرە پڕ لە خەونەوە ، بەم دڵە پەشمەکەوە ،
بە نیازی بگەیتە ماڵی چ دێوانەیەک
دەستە ساردو بێ تینەکانت ،
چارشێوێکی سەوزیان پێ ناچنرێ
لێوە بەبارەکانت ، نابنە جێژوانی پەپولەی ماچ
ئەی غەمگینترین ژن
هەموو گۆرانیە غەمگینەکانی دنیا
بکە گەردانەو بیکە ملت
ئەی عاشقترین
لە دنیای وەهم وخەیاڵا ، خەو ببینە
ئەی قەلەندەرترین
بە درێژایی کەنارەکانی ژیان
رەشماڵی تەنیایی هەڵدە ….
تەنیایی وبەس …
ئەرخەوان ڕەسوڵ
شاعیر و نووسەر و وەرگێر
