سەروتار
هەرمن ئەحمەد
ساڵ، هەتا چوار وەرزەكەی خۆی بەڕێ نەكات و هەریەك لە وەرزەكانیشی، سیحر و جوانییەكانی خۆیان لە لوتكەی خۆنواندندا نماییش نەكەن، نابێتە ساڵی تەواو.
ئێمە تا میوە خۆشەكانی هاوین تام نەكەین و بەدیار شنەبای فێنك و پرووشكە ئاوەكانی تاڤگەیەكی هاوینەهەوارەكانی چیاكانەوە، چایەكی سەماوەری خەڵووز هەڵنەقوڕێنین، تا بۆنی خاكی تەڕی یەكەم بارانی پاییز نەكەین و تابلۆی گەڵاڕێزانی نەبینین، تا ئێوارەیەك بە سەماوە نەچینە بەر پرووشە و كڕێوەی بەفری زستان و شەوێك لەبەر ئاگردانەكاندا قاوەیەكی گەرم نەخۆینەوە، تا ئاگری نەورۆز نەكەینەوە و جلە كوردییەكانمان نەپۆشین و مافوورە سەوزەكەی كەژوكێوی سروشتی كوردستان نەبینین و بەدەم بۆنی گوڵەكانی بەهارەوە، گوێ لە جریوەی تەیروتواڵ و قاسپەی كەو نەگرین، ناتوانین ساڵێك هەڵسەنگێنین.
گۆڤاری (ڕەوەند)یش، كە بە دەرچوونی ئەم ژمارەیەی بەردەستتان، چوار وەرزە و چوار ژمارەی یەكەمین ساڵی تەمەنی خۆی تەواو دەكات، چونكە گۆڤارێكی وەرزییە، كاتی هەڵسەنگاندنیەتی، ئێستا ئیتر كاتی ئەوە هاتووە، چ ئێمەی ستاف و هاوكارانی گۆڤارەكە و چ ئەو خوشك و برا رۆشنبیر و نووسەر و رۆژنامەوان و میدیاكارانەی، كە بە بڵاوكردنەوەی بابەت خزمەتیان بە گۆڤارەكە كردووە، چ خوێنەرانی هێژا و ئازیزمان، بە چاوخشاندنێك بە هەر چوار ژمارەكەی هەر چوار وەرزەكەدا، ئەم پرۆژە رۆژنامەوانییە هەڵسەنگێنن، كە بە ئامانجی خزمەتكردن و بەسەركردنەوەی كوردستانییانی تاراوگە، بەبێ جیاوازیی بیر و بۆچوون و ئایدۆلۆژیا و ئاراستەی سیاسی و ئایین و ئایینزا و نەتەوە، دامەزراوە.
ئێمە لەم گۆڤارە، بەر لە هەموو شت سوپاسگوزاری كۆنفیدراسیۆنی ڕەوەندی كوردستانیین، كە متمانەیان بە ئێمە بەخشی، بەدڵنیاییەوە ئێمەش هەوڵمان داوە لە ئاست ئەو متمانەیەدا بین، بۆیە شەو و ڕۆژمان خستووەتە سەر یەك و بەوپەڕی دڵسۆزی و خەمخۆرییەوە، بە هاوكاریی نووسەران و ڕۆشنبیرانی كورد و كوردستانی و بەتایبەتییش بە هاوكاریی دەزگای میدیایی (كوردستان كرۆنیكاڵ) كە بە سوپاسەوە، ئەركی نەخشەسازی و چاپكردنی گۆڤاری (ڕەوەند)ی خستووەتە ئەستۆ، هەموو توانای خۆمان خستووەتە گەڕ تا گۆڤارێكی نایاب و سەنگین هەم لەڕووی ناوەڕۆك و هەم لەڕووی دیزاین و چاپەوە بخەینە بەردەست خوێنەرانمان لە تاراوگە و لەناوەوەی كوردستانیش، كە ئاوێنەنمای كوردستانییان بێ.
ئێمە خۆشحاڵین، كە چ لە ڕێی پەیوەندیی ئۆنلاین و ئەلیكترۆنی و تەلەفۆنەوە، چ لە دیداری ڕووبەڕووماندا لەگەڵ كوردستانییانی تاراوگە و ڕۆشنبیبران و ئەهلی میدیا و ڕۆژنامەوانان، هەڵسەنگاندنی زۆر باشی گۆڤارەكەمان وەك فیدباگ پێ گەیشتووەتەوە، بێگومان سەرنج و ڕەخنەی بنیاتنەرانەشمان پێ گەیشتووە، بە هەردووكیان خۆشحاڵین، دەستخۆشییەكان زیاتر هانمان دەدات و پێداگرترمان دەكات لەسەر بەردەوامی، ڕەخنەكانیش هاوكارمان دەبن كە كارەكانمان پێشتر بخەین و كوالێتییان بەرزتر بێت و لە ڕێنووس و زمانی داڕشتنیشدا، زیاتر بەرەوپێش بچین.
ئێمە بە بەرپرسیارێتییەوە لە پرۆژەی گۆڤاری (ڕەوەند) كار دەكەین، بەڵام بە هەموو كوردستانییانی تاراوگەش دەڵێین: ”(ڕەوەند) گۆڤاری ئێمە نییە، بەڵكوو هی هەموو ڕۆشنبیران و ئەدیبان و نووسەرانی كورد و كوردستانییانی تاراوگەیە و ئاوێنەیەكە خۆتانی تێادا ببیننەوە، ئێمە تەنیا سەروكاری كارەكانی نووسین و دیزاین و چاپ و پەخشی دەكەین، ئەوە ڕۆشنبیر و نووسەرانن، كە دەتوانن بە بابەتەكانتان گۆڤارەكەتان جوانتر و پێشكەوتووتر بكەن.
ئەم كارە بۆ ئێمە دەستپێك بوو، بێگومان هەموو دەسپێكێكیش كەموكوریی خۆی دەبێت، بەشبەحاڵی خۆم ساڵانێكی زۆرە سەرەدەرییم لەگەڵ نووسین و كاری میدیا و رۆژنامەوانییدا هەیە، بەڵام سەرنووسەرایەتیی گۆڤارێكی سەنگین و گشتی و هەمەڕەنگی وەرزیی وەك (ڕەوەند) كە لایەنێكی گەورەی پڕبەخششی وەكوو كۆنفیدراسیۆنی ڕەوەندی كوردستانی دەریدەكات، بۆ من كارێكی تازە بوو، بۆیە سوپاسی هەر بەڕێزێك دەكەم، كە ڕۆژیك لە ڕۆژان بە یەك وشەش هاوكارم بووبێ، لەوەی ژمارە دوای ژمارە و وەرز دوای وەرز گۆڤاری (ڕەوەند) جوانتر و دەوڵەمەنتر و سەنگینتر بێت.
بێگومان ئێستا گۆڤاری (ڕەوەند) گۆڤارێكی ناسراو و باشە، لە لوتكەی سەركەوتن و دەركەوتندا نییە، ئەمما لە قۆناغی پێشڤەچوون و گەشەكردنی بەردەوامدایە بە هاوکاریی (کوردستان کرۆنیکاڵ)، بێگومان پشتوانییەکانی سەرپەرشتیاری گشتیی ڕەوەندی کوردستانی (شیفا بارزانی)یش لەبیر ناکەین.
خوێنەرانی هێژا.. كوردستانییانی خۆشەویستی تاراوگە، گۆڤاری (ڕەوەند) بە ئەرکی خۆی دەزانێت، کە ببێتە سەكۆیەكی كارا و كراوە بۆ ئێوە، نەخاسمە لە گواستنەوەی هەواڵی چالاكی و سەرکەوتنەكانتان، هەر چالاكییەكتان كرد، كە لە خزمەت كورد و كوردستاندا بوو، بینێرن بۆ ئێمە، هەر ڕا و ڕاپۆرت و بۆچوون و وتار و داهێنانێكتان هەیە، كە خزمەت بە كورد و كوردستان و مێژوو و فەرهەنگ و تواناكانیان بكات، هەر چالاكییەك كە ناوی كورد و كوردستانی تیادا دەدرەوشێتەوە، بە وێنەوە بینێرن بۆ ئێمە، تا ئێمەش بەبایەخەوە بیگەیەنین بە سەرجەم ڕەوەندی كورد لە تاراوگە و لە كوردستانیش، داواکارین ئێوەش هاوڕێ و هاوەڵی ئەم ڕێگەیەمان بن.
ئێمە چ وەک کۆنفیدراسیۆنی ڕەوەندی کوردستانی و چ وەك گۆڤاری (ڕەوەند) و تەواوی ماڵپەڕ و سەكۆ میدیاییەكانی سەر بە کۆنفیدراسیۆن، بۆ خزمەتی كوردستانییانی تاراوگە دامەزراوین، دەمانەوێ پشتیوانیان بین.
ئەنیشتاین دەڵێت: ”ئەگەر لەگەڵ كۆمەڵە خەڵكێكدا بڕۆیت، هەر دەگەیتە ئەو شوێنەی ئەوان بۆی دەچن. ئەگەر بەتەنیاش بڕۆیت، دەگەیتە شوێنێک پێش تۆ کەس بۆی نەچووە.“
ژان پۆل سارتەریش دەڵێت: ”ژیان سێ قۆناغی هەیە: لە یەکەمیان پێتوایە دنیا دەگۆڕیت، دووەمیان بۆت دەردەکەوێ دنیا ناگۆڕێت، سێیەمیان بۆت دەردەکەوێ دنیا تۆی گۆڕی.“
ئێمە لە گۆڤاری (ڕەوەند) بە خەون و ئاواتی سەركەوتنی گەورەوە هەنگاو دەنێین، دەمانەوێ بگەینە ئەو شوێنەی، كە كەس پێی نەگەیشتووە، دەزانین ئەگەر دنیاشمان پێ نەگۆڕێت، لەكۆتاییدا خۆمان دەگۆڕێین، هەر ئەم گۆڕینەشە ناهێڵێت كەللەوشك و دەمارگیر و چەقبەستوو بین.