ئاشتی گەرمیانی .. هۆڵەندا
لە بەرواری ١٩ حوزیران تاوەکو ٢٥ حوزەیرانی ٢٠٢٣ گەلەری کەبەریت دیو لەیس چیڤریوسی کە دەکەوێتە ڕۆژئاوای شاری پاریسەوە بە ٤٢ کم ، پێشانگایەکی هونەری شێوەکاری بۆ عەلی دەرویش کردەوە کە کارە هونەریەکانی بریتی بوون لە ٤٠ کاری هونەری پێوانە جیاواز کەبە کەرەستەی ئەکریلیك و ڕۆنی و گواش و قەڵەمی خەڵوزی و پاستیل کارەکانی ئەنجام دابوون ، گەلەری کەبەریت دیولەیس لە چیڤریوسی لەساڵانی ١٦٦١ دا دروست کراوە کەئەوکات کەبەریە بووە ، واتە جێگای مۆسیقاو مەی خواردن و دانس و هەڵپەڕکێ بە ئامێرە کۆنەکانی فەرەنسی وە بە پۆشاکی ئەو سەردەمەوە کە مۆدێلی کلاسیکی و ستایلی پۆشاکی کەلتووری ووڵاتی فەرەنسا بووە . مێژووی ئەو کەبەریە بە وێنەو تۆمارەوە لەنێو گەلەریەکەدا بە زمانی فەرەنسی نمایش کراوە .
هاوڕێێ ی سەردەمی زێڕینم هونەرمەند عەلی دەروێش کە مێژوومان دەگەڕێتەوە بۆ ساڵانی ١٩٨٠ کان ، ئەوکاتەی خەون و خەم و ماندوونمان لە پێناو هونەرو ڕۆشنبیری و کەلتووری شارەکەمان کەرکوك بوو ، لەو کاتەدا خەونمان ئەوە بوو کە ئازارەکانمان وە کێشەی کۆمەڵایەتی و سیاسی و کەلتووری میللەتەکەمان لە ڕێگای تابلۆو هێڵکاری و چالاکی یە هونەریەکانەوە بخەینە پێش چاوی خەڵکانی خۆمان و نەتەوەکانی تر کە تینیوی هونەرو ڕۆشنبیری بوون لەو شارەدا ، هاوڕێ تەمەن .. هاوڕێ تابلۆو کەڤاڵ و ڕەنگەکان و کەلتووری میللەتێکی پڕ لە خەزێنە ، لە پاش ئەزموونی٤٢ ساڵ بگرە زیاتریش لە زۆرێك لە گەلەری و هۆڵ و مۆزەخانەو سەرشەقام و نمایشگاکان پێشانگای تایبەتی و هاوبەشی ئەنجام داوە ، لە پاڵ هونەرە شێوەکاری یەکەی هونەری کاریکاتیوریش بەشێك بوە لە پرۆسەی هونەری هونەرمەند عەلی دەروێش ، کەلەکاتێکدا ئەو دەستی برد بۆ ئەو هونەرە کەم کەس یان هەر نەبووە بەشێوەیەکی بەرچاو کەسایەتیەکان وە لە ڕووی کۆمەڵایەتی یەوە بە شێوەی هونەری کاریکاتیوری دەربڕین لە ئێش و ئازارەکان بکات، لە زۆر جێگادا کارەکانی بوون بە چارەسەر وە لە زۆر جێگادا سەرئێشەی بۆ هونەرمەند دروست کردوە .
ئێستاش لەم پێشانگایەدا کە کارە هونەریەکانی بریتی بوون لە ٤٠ کاری هونەری لە هەمان خەون و بیرۆکەوە ، واتە کەلتووری ووڵاتی خۆمان تێکەڵ بە ژیانی ڕۆژانەی بە ستایلێکی تایبەت وە بە فۆرمێکی تایبەت ڕەنگدانەوەی هەبوە لەنێو پێشانگاکەدا ، هاوڵاتیانی فەرەنسیش زۆر سەرسامن بەو ستایلەی هونەرمەند عەلی دەروێش .
پاش گفتووگۆم لەگەڵ هونەرمەند عەلی دەروێش سەبارەت بە کارو پێشانگاکەی ووتی (( هەموو مرۆڤێك هەڵسوکەوتی خۆی هەیە ، ووتووێژی تایبەتی خۆی هەیە ، هونەرمەندیش وایە .. کە ستایلی تایبەتی خۆی هەیە . منیش لەکارەکانم دوو خاڵی تێدایە یەکەمیان سومبڵی میسیوپۆتامیا و سۆمەرییەکانە وە هەڵبژاردەی ڕەنگەکانە کە تایبەتن بە ڕەنگی گەرم لەکاتێکدا عەرەبەکان ڕەنگی قاوەی بەکار دەهێنن چونکە ناوچەکەیان گەرمە وە بیابانە ، بەڵام ئێمە لەبەر ئەوەی پۆشاکی کوردی زۆربەی ڕەنگەکانی تێدایە ئەو شێوازە ڕەنگ دانەوەی هەیە لە نێو کارە هونەریەکانمدا ، بابەتی ڕەوڕەوە وە چاوی گەورە دەگەڕێتەوە بۆ نمونەی ئاشوورییەکان ، وە گرنگیم بە جوڵە و هێز داوە ، هەندێك کەس لە نێو پێشانگاکەدا ووتویانە ئەمە ڕەنگ دانەوەی بیکاسۆی هونەرمەندە ! بەڵام من دەڵێم خۆ بیکاسۆش هەر لە مێژووی دێرینەوە بابەت و فۆرمی وەرگرتوە وە پۆل گوگان لە شارستانیەتی میسرەوە نمونەی وەرگرتوە ، زۆر لە بابەتەکان ئەوانیش موڵکی خۆیان نین ، بەڵکو کاریگەری و وەرگرتەی ئەو مێژووەن ، ستایلی خۆم بریتی یە لە مرۆڤەکان وە کەلتووری کوردستان و بەکارهێنانی هەڵبژاردەی ڕەنگ و فڵچەکان ، لە کارێکدا باس لە دوو گەنج دەکەم کە پایسکیل لێ دەخوڕن و دوو پیرەمێردیش لەگەڵیاندایە ، دیدەم وایە کە هێزو توانا وەکو تەمەن لەکارەدا خستومەتە ڕوو )) .
ئەی سەبارەت بە پۆستەری پێشانگاکەت ، بۆچی ئەو دوو کەسایەتیەت هەڵبژاردوە بەو ستایلە جیاوزەوە ؟
(( سەبارەت بە پۆستەرەکەم بریتی یە لە دوو مرۆڤ کە جمکن ، هەروەك خۆم و براکەم عومەر دەروێش کەلەدایك بوین جمك بوین ، شێوەمان لەیەکتر دەکات ، بۆیە لێرەدا من دوو کچم هێناوە کە دەربڕین لەو دیاردەیە دەکات )) .
هونەرمەند عەلی دەروێش لە ساڵی ٢٠١٥ وە لە ووڵاتی فەرەنسا نیشتەجێیە و چەندین پێشانگای تایبەتی لەو ووڵاتە کردۆتەوە بەکاری هونەری کاریکاتیوری وە بەو تابلۆیانەی کە ستایل و شێوازێکی تایبەتی خۆی هەیە وە خەڵکانی ئەو شارەش و هونەرمەندان و ڕۆشنبیران زۆر سەرسامن بەکارە هونەریەکانی هونەرمەند .
