ڕێکخەری حکومەتی هەرێمی کوردستان بۆ ڕاسپاردە نێودەوڵەتییەکان بەشداری دەکات لە کۆنفرانسی لایەنەکانی ڕێککەوتننامەی نەتەوە یەکگرتووەکان دژی تاوانە ڕێکخراوە نێودەوڵەتییەکان لە ڤییەنا
دکتۆر دیندار زێباری، ڕێکخەری ڕاسپاردە نێودەوڵەتییەکانی حکومەتی هەرێمی کوردستان بە سەرۆکایەتی شاندێکی حکومەتی هەرێمی کوردستان، ڕۆژانی ٢٩و٣٠ی حوزەیرانی ٢٠٢٦ بەشداری لە کۆنفرانسی لایەنەکانی ڕێککەوتننامەی نەتەوە یەکگرتووەکان دژی تاوانە ڕێکخراوە نێودەوڵەتییەکان دەکات لە چوارچێوەی شاندی کۆماری عێراق، لە کۆبوونەوەکانی گروپی کاری قاچاخی کۆچبەران، کە لەلایەن نووسینگەی نەتەوە یەکگرتووەکان بۆ ماددە هۆشبەرەکان و تاوانەکان (UNODC) لە ڤیەنای پایتەختی نەمسا ڕێکخراوە.
بەشداریکردنەکە زنجیرەیەک دانیشتن و گفتوگۆی تایبەتمەند لەخۆدەگرێت کە تیایدا تیشک دەخرێتە سەر بەرەنگاربوونەوەی قاچاخچێتی کۆچبەران، بازرگانیکردن بە مرۆڤ، بازرگانیکردن بە ماددە هۆشبەرەکان، و چارەسەرکردنی چالاکییەکانی تۆڕە تاوانکارییە ڕێکخراوە نێودەوڵەتییەکان.
ڕێکخەری ڕاسپاردە نێودەوڵەتییەکان جەختی لەوە کردەوە کە ئەم تەحەددایانە نوێنەرایەتی هەڕەشەیەکی گەشەسەندوو دەکەن بۆ سەر ئاسایش و سەقامگیری لە هەردوو ئاستی ناوچەیی و نێودەوڵەتیدا، بە لەبەرچاوگرتنی پەیوەندییان بە تۆڕە تاوانکارییە ڕێکخراوەکانەوە کە بارودۆخی ئابووری و مرۆیی ناسک بۆ قازانجی نایاسایی دەقۆزنەوە. ئەمەش پێویستی بە بەهێزکردنی هاوکارییە نێودەوڵەتییەکان و چڕکردنەوەی هەماهەنگی نێوان وڵاتان و دەزگا پەیوەندیدارەکانی نەتەوە یەکگرتووەکان هەیە.
ئاماژەی بەوەشکرد، حکومەتی هەرێمی کوردستان ڕێبازێکی یەکگرتوو دەگرێتەبەر کە ڕەهەندە ئەمنی و یاسایی و مرۆییەکان تێکەڵ دەکات، بە هەماهەنگی لەگەڵ حکومەتی فیدراڵی و هاوبەشە نێودەوڵەتییەکان. ئەمەش بریتییە لە پاراستنی قوربانییەکان، پشتگیریکردن لە گەڕانەوەی خۆبەخشانە، بەهێزکردنی بەرنامەکانی یەکگرتنەوە، و پەرەپێدانی توانا دامەزراوەییە پەیوەندیدارەکان و میکانیزمە نیشتمانییەکان.
هەروەها جەختی لە گرنگی فراوانکردنی هاوکاری لەگەڵ نەتەوە یەکگرتووەکان و نووسینگەی نەتەوە یەکگرتووەکان بۆ ماددە هۆشبەرەکان و تاوان (UNODC)، و بەهێزکردنی هاوبەشی تەکنیکی و بەرنامەکانی بنیاتنانی توانا کردەوە. ئەمەش بەشدار دەبێت لە پشتگیریکردنی هەوڵە نێودەوڵەتییەکان بۆ بەرەنگاربوونەوەی تاوانە ڕێکخراوە نێودەوڵەتییەکان و چارەسەرکردنی هۆکارە بنەڕەتییەکانی کۆچی ناڕێک.
