شەوی 09.09.2022 کۆبوونەوەی بەرپرسی ناوەندەکان لەگەڵ کۆمیتەی بەڕێوەبەری کۆنفدراسیۆن، بە بەشداری سەرۆکی کۆنفدراسیۆن و جێگرەکەی و بەشێک لە ئەندامانی کۆمیتەی بەڕێوەبەر بەڕێوەچوو .
کۆبوونەوەکە بە بەشداری زۆرینەی بەرپرسی ناوەندەکان بەڕێووەچوو، کە سەرەتا لەلایەن سەرۆکی کۆنفدراسیۆنەوە، ئیسماعیل کامل دەستی پێکرد و، کۆمەڵێ بابەت و پرسی تایبەتی کۆنفدراسیۆنی بۆ ناوەندەکان شیکردەوە، لەوانە کاروچالاکییەکانی کۆنفدراسیۆن لەوماوەی رابردوودا.
سەرۆکی کۆنفدراسیۆن ئاماژەی بە دامەزراندنی چەند رێکخراوێک و ناوندێکدا، لەوانە پڕۆژەی دامەزراندنی ڕێکخراوی پزیشکانی کوردستان لە دیاسپۆرا و، دامەزراندنی ناوەندی لێکۆڵینەوە و، کۆمیتەی ڕاوێژ و چاودێر و، کۆمیتەی بەشی پەیوەندییەکان و، ڕێکخستی ناوەند و کۆمەڵە و ڕێکخراوەکانی نێو کۆنفدراسیۆن و، دامەزراندنی بەردەوامی ناوەندەکان لە ئەمەریکا و روسیا و ئوسترالیا و کەنەدا و، وڵاتانی ئەروروپا و کاروچالاکیەکانیان .
لەگەڵ ئامادەکاری بۆ ھەندێ پڕۆژەی دیکەی گرینگ، کە کارکردن لەسەریان بەردەوامی ھەیە، لەوانە کۆمیتەکانی جینۆساید و ھونەرمەندان و، چەند کۆمیتەیەکی دیکەیشی بۆ بەشداربووانی کۆبوونەوەکە خستەڕوو .
دواتر جێگری سەرۆکی کۆنفدراسیۆن، لەسەر بابەتی ڕاگەیاندن و چەند پرسێکی تایبەتی وەک بابەتی زمان و، پڕۆژەی ھاوبەشی ناوەند و وەزارەتی پەروەردەی حکومەتی ھەرێم بۆ فێربوونی زمانی کوردی و، چەند لایەنێکی دیکەی کاروچالاکییەکانی باسکرد .
پاشان بەرپرسی ناوەندەکان پێشنیار و رەخنە و ئەجێندای کاروچالاکی خۆیان ئاماژەپێدان، هاوکات پرسیارەکانیان ئاڕاستەی ئەندامانی کۆمیتەی بەڕێوەبەر کرد و، پاشان سازان گروون سەبارەت بە کۆمیتەی ئافرەتان و لاوان چەند ڕوونکردنەوەیەکیدا، وە د. نورەدین خۆشناو بەھەمانشێوە ھەندێ بابەت و پرسی گشتی تاوتوێکرد و، رەحیم ڕەشیدی سەبارەت بەو سەردان و چالاکیانەی لە ئەمەریکا و کەنەدا بۆ دامەزراندنی سێ ناوەند، ڕوونکردنەوەیدا و، گفتوگۆی خۆیی لەو بارەوەکرد.