ناسیح خارگێڵانی
هۆرامان یون چا یاگە مێژووییە دیرۆکە سەرنج ڕاکیشا سەر و ئاست و کوردستانی گەورەینە، کە تا ئیسەیچ سەرنچو گردو ئاڵەمیش پەی لاو ویش کیش کەردەن.
ئی مەحاڵە زەریفە دڵگیرە کوسارە ڕەنگینە ژیوایش چەنە مگیڵۆوە پەی سەدان ساڵا وەڵی پێدا بیەی عیساو مەسیحی.
هۆرامان هەرجە سەرەتاوە جانیشتە و مەحاڵ و ویش بیەن،هەرگیز کوچەری و گەرمیان و کویسانش نەکەردەن.
هەر ئاهۆکارە بیەن، کە خەڵکەکەش پەشتی بە هیز و بازوو ئەقڵ و داهینان و ویش بەسۆو فرە پیداویستیەکا و ژیوایش بە دەس و ویش دروسی کەرونە، پیسە دروس کەردەی نمەدی و فەرەنجی و کەڕەکی و گورەوی و پوزەوانە و کڵاو کڵاوە و کاسە و چەمچەو شانە و دەها چیوی تەری، کە ئیسە نامەکیشا ویرما نیەنی.
سەرو ئانەیچۆ وەرو ئانەی، کە دەڤەرەکەش ناوچێوە کویسانی و تەڕوپاراوو دەها هانی و چەمی و کاریزیش چەنەبی، یاگێوە لەبارەنە پەی پەروەردەکەردەی و وەی کەردەی ئاژەڵ و مەڕوماڵاتی، کە چازەمانەنە سودشا جە پەژمی و مەرەزی هورگرتەن پەی پوشاکی و جل و بەرگی و دروسکەردەی دەواری و مۆجی و گڵیمە و کوڵ فاڕایۆ و کونەهورگرتەی، کە چندین دەزگێشا دروسی کەردینی پیسە جوڵایی و دەزگا و مۆج و جاجم و بەرماڵی و دوکڵە و لوکەڕیستەی.
ئی هۆکارە کەردەنش کارێ، کە خەڵک و هۆرامانی چەمشا نەدیۆ پەی دەس و هیچ کەسی و پەشتی بە ویش و ئابەرهەما بەسو،کە بەمانیایی و ڕەنج و تێکۆشان و ویش بەدەسش ئاوردەن. هەرئاهۆکارە کەردەنش کارێ کە تاکی هۆرامی بتاوۆ جە یاگی باووباپرا ویشەنە بە سەربەرزانە بژیۆ و گوزەران کەرو. وەرگە و گرد بارودۆخە وەش و ناوەشەکا زەمانەی گیرونە.
خەڵک و هۆرامانی بە دریژایی مێژوو ژیار و ویش باوڕش بەیەکتا پەرستی بیەن، خەڵکێ ویرمەند و ڕوحانیا، هەر ئا هوکارەنە، کە خەڵک و هۆرامانی خەڵکی ویرمەند و دوور وین و بە ئەزموون و نەرم و نیان و ڕوو وەش و ئاشتی واز و بە ویقارو وی ڕاگیراو باوڕ بە یەکسانی بەین و ژەن و پیای و ماف و تاکی هەن، سەرو کۆمەڵگەیۆ جە هەردوی ڕەگەزەکانە ڕیز و یەکتری گیرا و گوش پەی تەگبیر و ویر و ڕا و یەکتری مگیرانی.
هۆرامی بە عەزمە و ئانەی ناوچەکەش کویسانی و هەمیشە سەر سەوزا، دایمە ئاشقە سروشت و ئەدەب و هونەر دوس و موزیک دوسا و چنی گرد و وەرزەکا ویش گونجنان و ڕازە و ویش هەنەش. دیمەنی زەریف و ئۆکیسترا و باڵداری و هاژە و تاڤگە و هانە و وەرو مانگەشەوی و شوخ و شەنگی و سەلیقە وەشی ژەنەکا، کەردەنشا کارێ دەیان ئەدیب و شاعیری نویسەری ژیری و فەلسەفییش چنە هورگنا.
ئەگەر کەسێوە بیگانە یان گەشتیار سەر بدو ئۆ هۆرامانی، مزانو ئاگرد دیمەنە زەریف و سروشتی و سەرنج ڕاکیشە ژینگە پاک و پوختە و ئا دیوار بەندی و تەڵان تەڵان پلیکان ئاسا و باخ و موڵکەکاش ژیری و ویرمەندی و ژیوا و دانشمەندی و سەلیقەداری و خاک و ئاو وەشەویسی وەڵات پاریزی خەڵکەکەیش پۆوە دیارا.