بەهار حسەینی
من لە ڕۆژئاوای پێستتەوە
تا ڕۆژهەڵاتی و
لە باکووری باڵاتەوە
تا باشووریم ناردۆتە
نادیارترین شوێنی مێشکم.
ئەزانم وڕێنە دەکەم و
وڕێنەکانم تەنیا لای تۆ ئۆقرە دەگرن.
بەڵام تۆ لە نادیارترین شوێنی مێشکمی و
من دەترسم لە دووبارە خوێندنەوەت.
ئەزانم دەبێ ئینسان
ڕووبەڕووی ترسەکانی ببێتەوە
ئەزانم تا ئەبەد بێقەراریم
نۆتێکی سەرگەردانە، کە تۆ دەزانی بیژەنی.
بەڵام تۆ لە نادیارترین شوێنی مێشکمی و
من دەترسم بۆن بە لاپەڕەکانتەوە بکەم.