مەلەوانێکی سەندرۆم داونی کوردی مەهابادی رۆژهەڵاتی کوردستان، ڕیکۆردێکی مێژوویی تۆمار کرد و مەدالیای زێڕی ئۆڵۆمپیادی تایبەتی بەرلینی بە دەستهێنا.
شاهۆ محەممەدی، مەلەوانی کوردی خەڵکی مەهابادی ڕۆژهەڵاتی کوردستان، لە ئۆڵۆمپیادی تایبەتی “بەرلین”ی ساڵی 2023ی ئەڵمانیا بەشدار بوو و، توانی لە پێشبڕکێکاندا خولێکی تەواو لە پێش ڕکابەرەکانییەوە ببێت و، بە تۆمارکردنی ڕیکۆردی مێژوویی ٧ خولەک و ٤٦ چرکە، مەدالیای زێڕی بە دەستهێنا.
ئەگەری هەیە ناوی شاهۆ محەممەدی دوای ئەوەی کە لە تەمەنی ١٧ ساڵیدا مەداڵی زێڕی ئۆڵۆمپیادی تایبەتی بە دەستهێنا، ناوی لە کتێبی “گینس” تۆمار بکرێت.
شاهۆ محەممەدی تەمەن ١٧ ساڵ، یەکەم مەلەوانی سەندرۆم داونە لە جیهاندا، کە بتوانێت لە ئاوی ئازاددا مەلە بکات، ناوبراو لە تەمەنی ٦ ساڵییەوە بە شێوەیەکی پڕۆفیشناڵانە دەستی بە مەلەکردن کردووە.