30 Salroja (Peyman) 11.7.1994 êkemîn heftînama Duhokê pîrozbît.
تحیة تقدیر وتبریك للذکری الثلاثین 30 لصدور جریدة پەیمان (العهد) اول جریدة اسبوعیة فی دهوك. صدر العدد الاول فی 11.7.1994 حیث کنت انا رئیس تحریرها والاستاذ حبیب کلش صاحب امتیازها.
درست بەری 30 سالا وەکی ئەڤرۆ، هەژمارا 1 یا رۆژناما حەفتیانە (پەیمان)ل 11 تیرمەها 1994 ل دهۆکێ دەرکەفت. ئەز دامەزرینەرو سەرنڤیسکارێ وێ بووم و مامۆستا حبیب کەلەش خودانێ ئیمتیازێ بوو. بیرۆکا دەرێخستنا رۆژنامەکی ل دهۆکێ هزرا من بوو، و ل کۆمبوونەکا لقێ ئێکی پارتی ل دهۆکێ (کو وی دەمی بارەگەهێ لقێ ل نێزیکی خەستەخانا کەڤنا دهۆکێ بوو. مامۆستا فازل میرانی بەرپڕسێ لقێ بوو. مامۆستا قادر قەچاغ جێگرێ بەرپڕسێ لقێ بوو) من ئەڤ بیرۆکە پێشنیارکرو مامۆستایێ هێژا فازل میرانی و ئەندامێن لقێ پەسەندکر. ل دەسپێکێ سێ – چار ناڤەك هاتنە گەنگەشەکرن، لێ ل داویێ ژبوونا زیندیکرنا شۆڕەشا گولانێ ناڤێ (گولان) لسەر پێشنیارا مامۆستا فازل میرانی هاتەپەسەندکرن. پشتی کۆمبوونێ ئێکسەر ئەز چوومە وەزارەتا رەوشەنبیری ل هەولێرێ (کو وی دەمی نەمر شێرکۆ بێکەس وەزیر بوو) و من داخوازنامەك ب ناڤێ خۆ پێشکێشی وەزارەتێ کرو ئیجازا رۆژناما گولان لسەر ناڤێ خۆ (وەکی سەرنڤیسکار) وەرگرت، کو نها ژی دانا ئەسلی یا ئیجازا (گولان)ێ ل جەم من پاراستی یەو لسەر ناڤێ منە. پشتی هنگی ب هەیامەکی هەڤالێن راگەهاندنا مەرکەزی داخوازکر کو ناڤێ (گولان) بۆ وان بیت و ئەم بۆ خۆ ناڤەکێ دی هەلبژێرین. ل دەسپێکێ ئەم گەلەك عاجزبووین، لێ پشتی هنگی ئەز دگەل مامۆستا حبیب کەلەش کەفتم گەنگەشێ و من گۆتێ گرنگی نە دناڤی دا یە، بەلکی گرنگی درۆژنامێ دایە و دهۆك – ژبەر تایبەتمەندی یا زاراڤێ کرمانجی – پێدڤی رۆژنامەکی یە، چونکی زمان ب رێکا رۆژنامان پێشدکەڤیت و رۆژانە دێ ئێدیەم و پەیڤێن نوی هێنە دناڤ زمانی داو زاراڤێ کرمانجی دێ گەلەك دەولەمەندبیت. من ناڤێ (پەیمان) پێشنیارکرو ژ لایێ مامۆستا یێن هێژا فازل میرانی و حەبیب کەلەش و ئەندامێن لقێ ڤە هاتە قەبولکرن. ئەو بوو جارەکا دی ئەز چوومە هەولێرێ و من داخوازنامەکا دی پێشکێشی وەزارەتا رەوشەنبیری کرو (کو ئەز ئەدیب چەلکی سەرنڤیسکار بم و مامۆستا حبیب کەلەش خودانێ ئیمتیازێ) و من ئەڤ ئیجازە ژی وەرگرت و هاتم دهۆکێ و مە دەست ب بەرهەڤی یان کر بۆ دەرێخستنا رۆژناما حەفتەیی (پەیمان) کو هەژمارا ئێکێ ل 11.7.1994 رۆناهی دیت و بوویە جهێ خۆشحالیا هەموو خەلکێ دهۆکێ و دەڤەرا بەهدینان(تێبینی ناڤێ من لسەر رۆژنامێ ب ڤی رەنگی یە : ئەدیب نادر. کو نادر پاشناڤێ بنەمالا منە). هندەك هەڤالێن دی ژی بۆ ستافێ رۆژنامێ هاتنە دەسنیشانکرن (ئەوێن ل بیرا من : هێژایان بەهجەت هرۆری سکرتێرێ نڤیسینێ، رەشید فندی، مصدق تۆڤی، رەحمەتی رەمەزان عیسی، اسماعیل بادی ل دەستەیا نڤیسینێ) دگەل هندەك پەیامنێران و کادرێن تەکنیکی. ئەگەر هندەك ناڤ ل بیرا من نەمابن داخوازا لێبوورینێ ژ وان دکەم. پشتی هنگی ئەز گەلەك گەریام بۆ پەیداکرنا جهەکی بۆ رۆژنامێ. ب هاریکاریا هێژا بابەکر زێباری و پێشنیارا وی، جهێ کەڤنێ رۆژنامێ (ل نیڤەکا باژێڕێ ل پشت مەرکەزێ پۆلیسان، کو نها بوویە پارك) بۆ مە هاتەدەسنیشانکرن و مە ژی بۆ خۆ بەرهەڤکرو دەست بکارێ خۆ کر.
هەروەکی دپەیڤا هەژمارا ئێکێ دا هاتی، من خۆیاکریە کو مە ناڤێ (پەیمان) ژ شرینیا ناڤێ رۆژناما پەیمانا ئامەدێ – دیاربەکرێ وەرگرتی یە، ئەوا کو (میری کاتب زادە شوکری) ل باژێڕێ دیاربەکرێ ل 5.6.1909 دەرێخستی و من خۆیاکریە کو ئەڤ پەیمانا مە ژی درێژەپێدانا رێکا رۆژنامەڤانێن بەدرخانیان و تەڤایا کوردستانێ یە. ل دەسپێکێ ل هەموو رۆژێن دوشەمبی پەیمان دەردکەفت، لێ پشتی هنگی مە بڕیار دا کو ل هەموو رۆژێن چارشەمبی دەرکەڤیت، چونکی رۆژا چارشەمبی یا کوردانەو ل جەم کوردێن ئێزدی ژی حەتا نها یا پیرۆزە.
ئەدیب چەلکی
هانۆڤەر – ئەلمانیا
11.7.2024
